Новости

На барање на Владата, Европската Унија обезбеди 15,5 милиони евра за развој на руралната инфраструктура. Вкупниот износ на програмата, вклучувајќи го и кофинансирањето од страна на Владата изнесува 20,667 милиони евра. Програмата ја имплементира Министерството за финансии, а истата е администрирана од страна на Светска банка.

Во рамките на оваа програма се реализира проектот „Проектирање и изведба на фотоволтаични системи во рурални општини“. Преку реализацијата на овој проект, финансиран со средствата од Европската унија, се поставени фотоволтаични системи во 36 општини на вкупно 108 објекта со што се допринесува за заштеда на електрична енергија во јавните објекти преку користење на алтернативни извори за производство на енергија и заштита на животната средина. Со средствата од Европската Унија во општина Пробиштип, финансирано е поставување на фотоволтаични системи на следните објекти ООУ „Никола Карев“, Спортска сала во ООУ „Браќа Миладиновци “ и ЈОУДГ „Гоце Делчев“ – објект Изворче.

Со овој проект се зголеми и бројот на користени обновливи извори на енергија, согласно стратешките напори на Владата за поттикнување на користење на обновливи извори на енергија и заштита на животната средина.

Со набавката и инсталацијата на фотоволтаичните системи сите три објекти произведуваат по 15kW електрична енергија на час, со што се направија значајни заштеди кај овие објекти, воедно директно се намалауваат трошоците на Општината.

Вчера на 23 март на градскиот плоштад во Пробиштип се случи осмото традиционално издание на манифестацијата “Зелникот на баба” 2019.

Учество земаа 16 града од РМ, три од Р. Бугарија и еден од Р. Србија. На лице место се демонстрираше како се изготвува и како се пече под вршник. Имаше натпревар во брзо сукање, каде победи натпреварувачката од Новаци, за нај етно украсена маса беше избрана масата на гостите од Алексинац, Р. Србија. Најмногу средства собраа жените од Пробиштип. Даниела Темелковска и Ирена Спасовска направија одлична атмосфера, се играше на градскиот плоштад кој никогаш не е бил повеќе исполнет. КУД Злетовски рудари и балетот Магија беа преубав декор на сцената. Се на се уште едно успешно издание на Зелникот на баба, кое ќе биде запаметено по огромната посетеност…

Human art gallery, весели пуканки – pop corn и stick man се трите маски победнички на Злетовскиот маскенбал. Овие три маски ќе бидат дел од Пробиштипскиот маскенбал 2019. И годинава на Злетовскиот маскенбал беше мошне интересно, а имаше и голем број најразлични маски, сепак убедлива победа освои маската “Human art gallery” на креативниот ментор Емил Спасовски.

Почитувани сограѓанки,

На 23 март 2019 година (сабота) со почеток во 12 часот на градскиот плоштад ќе се одржи осмото издание на манифестацијата „Зелникот на баба“. Вообичаено ќе бидат изложени сите изработки од тесто на вредните наши сограѓанки и секако гостите од Македонија, Бугарија и Србија. На лице место ќе се демонстрира како се изработува овој наш традиционален специјалитет и печење под вршник. Ќе има натпревар во брзо сукање, а ќе има и едукација за изработка на зелник. Ќе бираме и нај етно украсена маса. Ги повикуваме сите наши сограѓанки кои сакаат да учествуваат на оваа убава манифестација да се пријават во Одделението за јавни дејности при Општина Пробиштип или на телефон 483 – 131, локал 107, каде ќе ги добијат сите потребни информации за учество.

ОПШТИНА ПРОБИШТИП
ОДДЕЛЕНИЕ ЗА ЈАВНИ ДЕЈНОСТИ

Во општина Пробиштип во тек е реализацијата на Проектот „Ревитализација и автоматизација на постоечките објекти за снабдување со вода за пиење во општина Пробиштип“, во вредност од 1,2 милиони евра, средства обезбедени по половина од Центарот за меѓународна соработка и развој од Република Совенија и Владата на Република Македонија.
Во моментот е завршен делот за надградба на постоечката пречистителна станица за вода за пиење Пробиштип и поставен е дополнителен ултрафилтрациски модул со капацитет од 25 l/s.
Со ова вкупниот капацитет на произведена вода за пиење е 100 l/s.
Во следната фаза на проектот следи рехабилитација и автоматизација на пумпните станици Ратавица, Злетово и Добрево. Приоритет е даден на пумпната станица Ратавица како најсложен објект, објект кој не работи и е запуштен, уште од моментите на пуштењето во употреба на филтер станицата во Пробиштип пред 6 години.
Целата постоечка хидромеханичка и електро опрема е извадена и се работи на санација на објектот, односно градежно-занаетчиски работи.
Воедно, во процедура е набавката на новата хидромеханичка и електро-командна опрема за сите пумпни станици, како и за новата трафостаница за пумпната станица Ратавица.

Во просториите на Домот на културата „Злетовски рудар“ Пробиштип се одржа втората работилница на тема: “Kомуникација со лица со попреченост и овозможување на соодветен пристап до информации од јавен карактер” како специфична цел на проектот од веќе потпишаниот меморандум за соработка помеѓу општина Пробиштип и Здружението за промоција и развој на инклузивно општество „ИНКЛУЗИВА“ од Куманово.

На работилницата присуствуваа претставници од општина Пробиштип, Центар за социјална работа, основните и средни училишта, детската градинка и др. каде беа опфатени следните теми: правото за пристап до информации од јавен карактер согласно Конвенцијата на ОН за правата на лицата со попреченост, Закон за слободен пристап до информации од јавен карактер во Македонија, како и техники и методи на комуникација со лица со различен вид на попреченост.

Оваа активност е во рамките на проектот „Пристапни и достапни – jавни информации и услуги” кој има за цел да придонесе кон подобрување на локалните услуги преку поефикасно доставување на информации од јавен карактер и комуникација со граѓаните со попреченост во источниот регион на Македонија.

Проектот е дел од вториот повик за регрантирање дел од проектот ,,Граѓанска алијанса за транспарентност – Набљудување на процесот на реформи на јавната администрација од страна на граѓанските организации”,  кој го спроведуваат Фондација Отворено општество – Македонија и Евротинк – Центар за европски стратегии, а финансиски е поддржан од Европската унија.