Новости

Во организација на здружението „Бадникови поворки“, 130 дечиња во Бадникарска поворка дојдоа на градскиот плоштад каде пред големата елка ги пречека градоначалникот на општина Пробиштип Драган Анастасов. Дечињата на еден симболичен начин го најавија Христовото раѓање пеејќи ја песната Вечниот Бог, а Градоначалникот на сите „коледари“ им дари по едно бадниково пакетче, честитајќи им го празникот што следи. Еден убав настан, кој во договор со Општина Пробиштип ќе прерасне во една традиција, а од година во година ќе се збогатува содржината. За многу години верскиот празник Божиќ…Христос се роди…

Во чест на големиот верски празник „Божиќ“, традиционално на 5 јануари се береа бадниковите гранчиња, кои ќе бидат украсен елемент на  бадниковата трпеза.

Годинава оваа традиционална манифестација започна во Гостилница „Читална“, каде се собраа претставници од бизнис заедницата, во потрага за паричката, преку која се бира кум на настанот и организатор за наредната година.

Домаќин на настанот беше минатогодишниот кум, Влатко Кијајов, претставник на Авто центар „Пекор“. Паричката, но и златникот, дар од градоначалникот Драган Анастасов, му припадна на Дејан Јосев, претставник на млекарницата „Алпина деј“ Пробиштип, кој беше избран за нов кум, но и организатор за наредната година.

Местото викано Жгури, се исполни со посетители, подржувачи на оваа манифестација. Ги имаше и од Пробиштип и од Кратово. Свештени лица од црквата Успение на Пресвета Богородица ја благословија трпезата, а паричката и сребреникот од Градоначалникот и се падна на директорката на ООУ „Никола Карев“, Атинка Стојчевска Барљамова, која исто така ќе биде дел од организацијата за наредната година.

Целата манифестација беше пропратена со музика, а присутните освен посната трпеза имаа можност да уживаат во убавата музика, да запеат, но и да заиграат. Генерален покровител на настанот е Општина Пробиштип.

По повод Новогодишните и Божиќните празници Градоначалникот на општина Пробиштип, Драган Анастасов подари новогодишно пакетче на секое дете од ЈОУ ДГ „Гоце Делчев“ од Пробиштип.

За прв пат, Општина Пробиштип реши да ги изненади сите дечиња на последниот работен ден од старата година и да им посака среќни и весели детски денови.

Денес 28.12.2017 (четврток), по повод новогодишните и божиќните празници, Градоначалникот на општина Пробиштип, Драган Анастасов оствари средба со Oпштинската организација на Црвен крст – Пробиштип, Здружението на инвалиди на трудот од Пробиштип и Здружението на пезнионери од Пробиштип.

На средбите се разговараше за идните планови и активности на овие здруженија и можностите за потпишување на меморандуми за соработка, со кои Општината ќе придонесе за подобро и поуспешно  фукционирање.

Денес, (26.12.2017 г.) дечињата од ЈОУДГ „Гоце Делчев“,  корисниците во  Дневниот центар за лица со телесна или ментална попреченост и учениците од паралелката за деца со посебни потреби при ООУ„Браќа Миладиновци“ од Пробиштип, на градоначалникот Драган Анастасов, му ги честитаа Новогодишните и Божиќните празници, со рецитали и новогодишни песни му посакаа среќна и успешна година.

Градоначалникот ѝм посака среќни и весели детски денови и ѝм додели подароци.

Денес на 19.12.2017 година (вторник) Градоначалникот на општина Пробиштип, Драган Анастасов, заедно со м-р Васко Златковски и Марјан Михаилов, како експерти во проектот за БИООТПАД, во Конференциската салата при Домот на културата на Општина Пробиштип одржаа прес конференција за проектот. Општина Пробиштип е партнер заедно со уште три грчки општини и Универзитетот „Гоце Делчев“ од Штип во процесот на сепарација на ѓубриво и добивање на биоѓубриво од органските материи кои се исфрлаат од угостителските објекти и дел од домаќинствата.

На прес конференцијата зборуваше градоначалникот Драган Анастасов со осврт на бенефитот од БИООТПАД за општина Пробиштип. Излагање имаше и проектниот менаџер м-р Васко Златковски за техничките спецификации на проектот и неговата имплементација во наредните години.

Денес, 11.12.2017 (понеделник) Градоначалникот на општина Пробиштип, Драган Анастасов, одржа работен состанок со директорката на Источен плански регион, Драгица Здравева, националната координаторка на Програмата за зачувување на природата, Марјана Шушлевска и градоначалникот на општина Кратово Љупчо Бојаџиев, за номинирање на Лесново за Гео Парк. На состанокот се разговараше за можностите за забрзан развој во Кратовско – Злетовската област и зачувување на Гео вредностите.

Во чест на празникот 8 Декември, Св. Климент Охридски, во минералошката збирка при Домот на култура, се случи изложба на фотографии добиени на Конкурсот за фотографии 2017. Сите вљубеници во добрата фотографија имаа можност да учествуваат на овој конкурс со фотографии во две категории, зададена тема „Мојот убав Пробиштип“ и слободна тема, но исклучиво фотографии од општина Пробиштип. На отварањето на изложбата на фотографии, градоначалникот на општина Пробиштип, Драган Анастасов им додели дипломи со вредносни ваучери за наградените фотографии. Оваа година се погоди истите фотографи да ги добијат наградите и во двете категории. Со награда се закитија Давче Насевски кој го освои третото место со фотографиите „Манастир во фокус“ и „Бои на надеж“, Крсто Трајковски го освои второто место за „Есен во Марчино“ и „Снежната црква“, а со првото место се закити Константин Митевски за фотографиите „Есенски бои“ и „Пробиштип во ноќ“.